Ish-përfaqësuesi i Lartë për Bosnje e Hercegovinë, Paddy Ashdown, ka vdekur sonte në moshën 77 vjeçare, pas një sëmundje të shkurtër.

Lajm për vdekjen e Ashdownit, e ka bërë të ditur zëdhënësi i partisë Liberal Demokrate, të cilën e udhëhoqi nga viti 1988 deri më 1999.

Kreu i Liberal Demokratëve, Sir Vince Cable tha se Paddy Ashdown ishte një hero për të, “ai shpëtoi dhe ringjalli Liberal Demokratët, nga epërsia jonë më e ulët, na çoi në rezultatin tonë më të mirë për 70 vjet. Si një lëvizje, i detyrohemi ekzistencës sonë”.

Paddy Ashdown u bë përfaqësues i lartë për Bosnje në maj të vitit 2012.

Ashdown gjithashtu kishte shërbyer si emisar i Qeverisë britanike gjatë luftës në Kosovë më 1998 dhe 1999, ndërsa ishte një nga përkrahësit më të mëdhenj të intervenimit ushtarak të NATO-s në Kosovë.

Ai ishte në mesin e përfaqësuesve të parë të komunitetit ndërkombëtar që e kishte paralajmëruar Sllobodan Millosheviqin për krimet që po i kryente në Kosovë.

Dëshmia e tij në Tribunalin e Hagës ndaj Millosheviqit i ndihmoi prokurorisë të demonstronte se Millosheviqi ishte i vetëdijshëm për krimet që po kryheshin nën komandën e tij kundër shqiptarëve të Kosovës, që ishte një prej elementeve ligjore të nevojshme për ta bërë atë përgjegjës për veprimet e vartësve të tij.